ആവശ്യത്തിന്‌ ഡോക്ടര്‍മാരോ ചികിത്സ സൗകര്യങ്ങളോ ഒന്നും ഇല്ലാഞ്ഞിട്ടല്ല പലപ്പോഴും നമ്മുടെ നാട്ടില്‍ രോഗനിര്‍ണ്ണയങ്ങള്‍ വൈകുന്നത്‌. എന്തെങ്കിലും ഒരു രോഗം വന്നാല്‍ ഇതിനിപ്പോള്‍ ഏത്‌ ഡോക്ടറെയാണ്‌ സമീപിക്കേണ്ടത്‌ എന്ന ആശയക്കുഴപ്പം പലര്‍ക്കും ഉണ്ട്‌. ആരെ കാണണം എന്നതിനെ പറ്റി വ്യക്തതയില്ലാത്തതിനാല്‍ ആശുപത്രി സന്ദര്‍ശനവും രോഗനിര്‍ണ്ണയവും വൈകി പല സങ്കീര്‍ണ്ണതകളും അകാലമരണവും വരെ ഉണ്ടാകുന്നു. വേറെ ചിലരാകട്ടെ ഏത്‌ ഡോക്ടറെ കാണണമെന്ന്‌ അറിയാത്തതിനാല്‍ ആവശ്യമില്ലാതെ സ്‌പെഷ്യലിസ്റ്റ്‌ ഡോക്ടറെ കണ്ട്‌ അധികചെലവുകളും സമയനഷ്ടവും വരുത്തി വയ്‌ക്കാറുണ്ട്‌. സാങ്കേതിക വിദ്യയുടെ പുരോഗതി മൂലം ഓണ്‍ലൈനായി വരെ ഇന്ന്‌ ഡോക്ടര്‍മാരെ കണ്‍സള്‍ട്ട്‌ ചെയ്യാനുള്ള സാധ്യതയുണ്ട്‌. അപ്പോഴും ഏത്‌ രോഗത്തിന്‌ ഏത്‌ ഡോക്ടര്‍ എന്നുള്ള ആശയക്കുഴപ്പം മാറുന്നില്ല.
ഇക്കാര്യത്തില്‍ പ്രാഥമികമായി ചെയ്യാനുള്ളത്‌ ഏതെങ്കിലും രോഗലക്ഷണങ്ങള്‍ ശ്രദ്ധയില്‍പ്പെടുന്ന പക്ഷം നിങ്ങളുടെ കുടുംബ ഡോക്ടറെയോ അല്ലെങ്കില്‍ ഏതെങ്കിലും ജനറല്‍ ഫിസിഷ്യനെയോ കാണുക എന്നുള്ളതാണ്‌. പനി, ജലദോഷം, സങ്കീര്‍ണ്ണമാകാത്ത പ്രമേഹം, ഹൈപ്പര്‍ടെന്‍ഷന്‍, പൊതുവേയുള്ള ചില മാനസികാരോഗ്യ പ്രശ്‌നങ്ങള്‍, ചെറിയ പരുക്കുകള്‍, രോഗം വരുന്നതിന്‌ മുന്‍പേയുള്ള പ്രതിരോധ ചികിത്സ എന്നിവയ്‌ക്കെല്ലാം ജനറല്‍ ഫിസിഷ്യന്‍ മതിയാകും. പ്രാഥമികമായ പരിശോധനകളും ഈ തലത്തില്‍ തന്നെ നിര്‍ദ്ദേശിക്കപ്പെടും. രോഗം ഒരു വിദഗ്‌ധന്റെ പരിചരണമോ പരിശോധനയോ ആവശ്യമുള്ളതാണെങ്കില്‍ സ്‌പെഷ്യലിസ്റ്റിന്റെയടുത്തേക്ക്‌ നിങ്ങളെ കൃത്യമായി റഫര്‍ ചെയ്യാനും ജനറല്‍ ഫിസിഷ്യന്‍ സഹായിക്കും.
നെഞ്ച്‌ വേദന, ശ്വാസംമുട്ടല്‍
സഹിക്കാന്‍ പറ്റാത്ത നെഞ്ച്‌ വേദനയും നെഞ്ചില്‍ ആരംഭിച്ച്‌ കൈകളിലേക്കും താടിയെല്ലിലേക്കുമൊക്കെ വ്യാപിക്കുകയും ചെയ്യുന്ന വേദനയുമെല്ലാം ഹൃദയാഘാത ലക്ഷണങ്ങളാണ്‌. ഇതിനൊപ്പം അമിതമായ വിയര്‍പ്പ്‌, ബോധക്ഷയം, കടുത്ത ശ്വാസംമുട്ടല്‍ എന്നിവയുണ്ടെങ്കില്‍ അത്യാഹിത വിഭാഗത്തില്‍ തന്നെ ചികിത്സ തേടണം. മുഖം പെട്ടെന്ന്‌ കോടല്‍, സംസാരം കുഴഞ്ഞ്‌ പോകല്‍, പെട്ടെന്നുള്ള ദുര്‍ബലത തുടങ്ങിയവ പക്ഷാഘാതത്തിന്റെ ലക്ഷണമാകയാല്‍ ഈ ലക്ഷണങ്ങള്‍ക്കും അത്യാഹിത വിഭാഗത്തില്‍ ചികിത്സ തേടേണ്ടതാണ്. ഇത്രയും കടുത്തതും നിരന്തരവുമല്ലാതെ ഇടയ്‌ക്കെത്തി ബുദ്ധിമുട്ടിക്കുന്ന നെഞ്ച്‌ വേദനയുടെ കാരണങ്ങള്‍ കണ്ടെത്താനായി ജനറല്‍ ഫിസിഷ്യനെ കണ്ട്‌ ആവശ്യമെങ്കില്‍ അവരുടെ നിര്‍ദ്ദേശപ്രകാരം കാര്‍ഡിയോളജിസ്‌റ്റിനെയോ പള്‍മനോളജിസ്‌റ്റിനെയോ കാണാവുന്നതാണ്‌. ഇസിജി, ട്രോപോണിന്‍, നെഞ്ചിന്റെ എക്‌സ്‌റേ, എക്കോകാര്‍ഡിയോഗ്രാം, സ്‌പൈറോമെട്രി പോലുള്ള പരിശോധനകളും ഏത്‌ വിദഗ്‌ധനെ കാണണമെന്ന കാര്യത്തില്‍ മാര്‍ഗ്ഗനിര്‍ദ്ദേശം നല്‍കും.
വയര്‍ വേദന, മഞ്ഞപിത്തം
ദഹനസംബന്ധമായ വേദന, അതിസാരം, മലബന്ധം, മലത്തില്‍ രക്തം, അകാരണമായ ഭാരനഷ്ടം തുടങ്ങിയ ലക്ഷണങ്ങള്‍ക്ക്‌ ഗ്യാസ്‌ട്രോഎന്ററോളജിസ്‌റ്റിനെ കാണാവുന്നതാണ്‌. മഞ്ഞ കണ്ണുകള്‍, മഞ്ഞനിറത്തിലെ ചര്‍മ്മം, കരള്‍ എന്‍സൈമുകളുടെ അമിതമായ തോത്‌ എന്നിവയെല്ലാം ഹെപ്പറ്റോളജിസ്‌റ്റിന്റെ അടുത്തേക്ക്‌ റഫര്‍ ചെയ്യാന്‍ പര്യാപ്‌തമായ ലക്ഷണങ്ങളാണ്‌.
നിരന്തരമായ തലവേദന, മരവിപ്പ്‌
സാധാരണ വരുന്ന ടെന്‍ഷന്‍ തലവേദനകളൊക്കെ ജനറല്‍ ഫിസിഷ്യന്റെ പരിചരണത്തില്‍ തന്നെ പരിഹരിക്കപ്പെടും. എന്നാല്‍ പെട്ടെന്നുണ്ടാകുന്ന കടുത്ത തലവേദന, മരവിപ്പ്‌, ദുര്‍ബലത, കാഴ്‌ച പ്രശ്‌നം, ചുഴലി, ധാരണശേഷി പടിപടിയായി കുറയല്‍ പോലുള്ള ലക്ഷണങ്ങള്‍ ന്യൂറോളജിസ്‌റ്റിന്റെ വിദഗ്‌ധ ചികിത്സ ആവശ്യപ്പെടുന്ന രോഗത്തിന്റെ ലക്ഷണങ്ങളാണ്‌. എംആര്‍ഐ, സിടി സ്‌കാനുകള്‍, നാഡീവ്യൂഹപരമായ പരിശോധനകള്‍ എന്നിവ ഈ ഡോക്ടര്‍ നടത്തും. ശസ്‌ത്രക്രിയ ആവശ്യപ്പെടുന്ന തരം നാഡീവ്യൂഹ പ്രശ്‌നങ്ങള്‍ക്ക്‌ ന്യൂറോസര്‍ജന്റെ സേവനവും ആവശ്യമായി വരും.
കാത്‌, മൂക്ക്‌, തൊണ്ടയ്‌ക്ക്‌ ഇഎന്‍ടി
ചെവി, മൂക്ക്‌,തൊണ്ട, സൈനസ്‌, ലാരിങ്‌സ്‌, ഓറല്‍ ക്യാവിറ്റി, മുഖം എന്നിവയുമായി ബന്ധപ്പെട്ട പ്രശ്‌നങ്ങള്‍ക്ക്‌ ഇഎന്‍ടി വിദഗ്‌ധനെ കാണേണ്ടതാണ്‌. ചെവിയിലെ അണുബാധ, സൈനസ്‌ അണുബാധ, കേള്‍വിനഷ്ടം എന്നിവയെല്ലാം ഈ സ്‌പെഷ്യലിസ്റ്റ്‌ ചികിത്സിക്കേണ്ട രോഗങ്ങളാണ്‌.
ചര്‍മ്മം, മുടി, നഖം
ചര്‍മ്മത്തിലെ തിണര്‍പ്പ്‌, എക്‌സീമ, പെട്ടെന്നുള്ള മുടി കൊഴിച്ചില്‍, സംശയമുണര്‍ത്തുന്ന മറുകുകള്‍, കോസ്‌മെറ്റിക്‌ ചികിത്സ, നഖത്തില്‍ വരുന്ന മാറ്റങ്ങള്‍ എന്നിവയ്‌ക്ക്‌ ചര്‍മ്മരോഗ വിദഗ്‌ധനെ dermatologist നെ കാണേണ്ടതാണ്‌.
മാനസികാരോഗ്യം, ഉറക്കം, പെരുമാറ്റത്തിലെ വ്യതിയാനങ്ങള്‍
നിരന്തരമായി മോശം മൂഡ്‌, ആത്മഹത്യ ചിന്ത, കടുത്ത ഉത്‌കണ്‌ഠ, ഉറക്കത്തിലെ തടസ്സങ്ങള്‍, പെരുമാറ്റത്തിലെ വ്യതിയാനങ്ങള്‍ എന്നിവയ്‌ക്കെല്ലാം ഒരു മനശാസ്‌ത്രവിദഗ്‌ധന്റെ സേവനം തേടേണ്ടതാണ്
എല്ലുമായി ബന്ധപ്പെട്ട പ്രശ്‌നങ്ങള്‍
എല്ല്‌ ഒടിയല്‍, പൊട്ടല്‍, കണങ്കാല്‍ തിരിയല്‍, നടുവേദന, കൈകാല്‍ വേദന പോലുള്ള പ്രശ്‌നങ്ങള്‍ക്ക്‌ ഓര്‍ത്തോപീഡിക്‌ സര്‍ജനെയും നിരന്തരമായ സന്ധിവേദന, രാവിലെ എഴുന്നേല്‍ക്കുമ്പോള്‍ സന്ധികള്‍ക്ക്‌ ദൃഢത പോലുള്ള പ്രശ്‌നങ്ങള്‍ റുമാറ്റോളജിസ്‌റ്റിനെയും കാണാം
