ശരീരഭാരം കുറച്ച് ഫിറ്റ് ആകാൻ ആഗ്രഹിക്കുന്ന പലരും ഏറെ പ്രയാസപ്പെടുത്തുന്ന വിഷയങ്ങളിലൊന്നാണ് വയറിന് ചുറ്റുമുള്ള കൊഴുപ്പ്. സ്ഥിരമായി വ്യായാമം ചെയ്യുകയും ഭക്ഷണത്തിൽ ശ്രദ്ധിക്കുകയും ചെയ്തിട്ടും ഈ കൊഴുപ്പ് കുറയാത്തത് നിരാശയുണ്ടാക്കിയേക്കാം. അതിനായി, കൂടുതൽ കഠിനാധ്വാനം ചെയ്യുന്നതിന് പകരം ശരീരം എങ്ങനെ കൊഴുപ്പ് സംഭരിക്കുകയും എരിച്ചുകളയുകയും ചെയ്യുന്നു എന്ന കാര്യങ്ങൾ മനസ്സിലാക്കി നോക്കാം.
കലോറി ശ്രദ്ധിക്കാം
ഭക്ഷണത്തിന്റെ അളവ് നിയന്ത്രിക്കാൻ മറന്നാൽ ആരോഗ്യകരമായ ഭക്ഷണക്രമം പോലും താളം തെറ്റും. പീനട്ട് ബട്ടർ, ഗ്രനോള, സ്മൂത്തികൾ, സാലഡ് ഡ്രെസ്സിങ്ങ് തുടങ്ങിയവയിലെ കലോറി ശ്രദ്ധിക്കണം. കുറച്ച് ദിവസത്തേക്ക് കഴിക്കുന്ന ഭക്ഷണം നിരീക്ഷിക്കുന്നത്, ഈ ഒളിഞ്ഞിരിക്കുന്ന കലോറികൾ എവിടെ നിന്നാണ് വരുന്നതെന്ന് കണ്ടെത്താനും അവയെ നിയന്ത്രിക്കാനും സഹായിക്കും.
വിട്ടുമാറാത്ത സമ്മർദ്ദം
വയറിലെ കൊഴുപ്പ് കൂടുന്നതിന് കോർട്ടിസോൾ ഒരു പ്രധാന കാരണമാണ്. നിരന്തരമായ സമ്മർദ്ദവും കോർട്ടിസോൾ എന്ന ഹോർമോണും വയറിന് ചുറ്റും കൊഴുപ്പ് സംഭരിക്കാൻ ശരീരത്തെ പ്രേരിപ്പിക്കുന്നു. ശരീരത്തിന്റെ ആവശ്യത്തിനായി ചെയ്യുന്നതാണെങ്കിലും ഇന്നത്തെ കാലത്ത് നിരന്തരമായ സമ്മർദ്ദം ഇതിനെ ഒരു ആരോഗ്യ പ്രശ്നമാക്കി മാറ്റുന്നു.
കൃത്യമായ ഉറക്കം
ഉറങ്ങുമ്പോഴാണ് ശരീരം സന്തുലിതാവസ്ഥ കൈവരിക്കുന്നത്. ഉറക്കം തടസ്സപ്പെടുന്നതോടെ ശരീരം ഉയർന്ന കലോറിയും പഞ്ചസാര അടങ്ങിയ ഭക്ഷണങ്ങൾക്കായി കൊതിക്കുകയും ഊർജ്ജം ശരിയായി ഉപയോഗിക്കാൻ പ്രയാസപ്പെടുകയും ചെയ്യുന്നു.
അമിതമായ മധുരം
അമിതമായി സംസ്കരിച്ച ഭക്ഷണങ്ങളും മധുരപാനീയങ്ങളും അടങ്ങിയ ഭക്ഷണക്രമം ഇൻസുലിന്റെയും രക്തത്തിലെ പഞ്ചസാരയുടെയും അളവ് വർധിപ്പിക്കുന്നു. ഉയർന്ന ഇൻസുലിൻ അരക്കെട്ടിൽ കൊഴുപ്പ് അടിഞ്ഞുകൂടുന്നതിന് കാരണമാകും. ശുദ്ധീകരിച്ച കാർബോഹൈഡ്രേറ്റുകൾക്ക് പകരം നാരുകൾ, ധാന്യങ്ങൾ, പഴങ്ങൾ എന്നിവ ഭക്ഷണത്തിൽ ഉൾപ്പെടുത്താം.
ഹോർമോൺ അസന്തുലിതാവസ്ഥ
ഈസ്ട്രജൻ, ടെസ്റ്റോസ്റ്റിറോൺ, തൈറോയ്ഡ് തുടങ്ങിയ ഹോർമോണുകൾ ശരീരം എവിടെ കൊഴുപ്പ് സംഭരിക്കണമെന്നും സംസ്കരിക്കണമെന്നും നിർണയിക്കുന്നു. ഡോക്ടറുടെ സഹായത്തോടെ ഹോർമോൺ അസന്തുലിതാവസ്ഥ കണ്ടെത്തുകയും പരിഹരിക്കുകയും ചെയ്യാം.
മദ്യം
മദ്യം ശരീരത്തിലെത്തുമ്പോൾ, അത് പൂർണ്ണമായി വിഘടിക്കുന്നത് വരെ കരൾ കൊഴുപ്പ് സംസ്കരിക്കുന്നത് നിർത്തുന്നു. ഇത് അവയവങ്ങൾക്കും അരക്കെട്ടിനും ചുറ്റും കൊഴുപ്പ് അടിഞ്ഞുകൂടുന്നതിന് കാരണമാകും.
ക്രമരഹിതമായ ദിനചര്യ
ശരീരത്തിലെ കൊഴുപ്പ് കുറയുന്നത് ചിട്ടയായ ജീവിതക്രമം, കൃത്യമായ ഇടവേളകളിലുള്ള ഭക്ഷണം, ഉറക്ക ശീലം, വ്യായാമം എന്നിവയെ ആശ്രയിച്ചിരിക്കുന്നു. ഭക്ഷണം ഒഴിവാക്കുന്നതും ഭക്ഷണക്രമം തുടർച്ചയായി മാറ്റുന്നതും ശരീരത്തെ ആശയക്കുഴപ്പത്തിലാക്കുകയും ഉപാപചയ പ്രവർത്തനങ്ങൾ മന്ദഗതിയിലാക്കുകയും ചെയ്യും.
രോഗാവസ്ഥ
ഹൈപ്പോതൈറോയിഡിസം, പി.സി.ഒ.എസ്, പ്രമേഹം തുടങ്ങിയ ചില രോഗാവസ്ഥകൾ മിക്കപ്പോഴും ശരീരഭാരം കുറയുന്നതിന് പകരം വയറിലെ കൊഴുപ്പ് കൂടുന്നതിന് കാരണമാകുന്നു. ഇത്തരം കേസുകളിൽ വിദഗ്ധോപദേശം തേടേണ്ടതാണ്
