പൗരാണിക കാലം മുതലേ ഔഷധഗുണങ്ങൾക്ക് പേരുകേട്ട നെല്ലിക്കയുടെ ആരോഗ്യഗുണങ്ങൾ ആധുനികശാസ്ത്രവും അംഗീകരിച്ചതാണ്. കൊളസ്ട്രോള്‍ കുറയ്ക്കാൻ നെല്ലിക്കയ്ക്കുള്ള കഴിവ് ഉൾപ്പെടെയുള്ള ഗുണങ്ങൾ നിരവധി പഠനങ്ങളിലൂടെ തെളിയിക്കപ്പെട്ടതാണ്. നെല്ലിക്ക ടോട്ടൽ കൊളസ്ട്രോളും ചീത്ത കൊളസ്ട്രോളും (LDL) ട്രൈഗ്ലിസറൈഡും കുറയ്ക്കുകയും നല്ല കൊളസ്ട്രോൾ കൂട്ടുകയും ചെയ്ത് ലിപ്പിഡ് പ്രൊഫൈൽ മെച്ചപ്പെടുത്തും എന്ന് ആറു പഠനങ്ങളുടെ ഒരു മെറ്റാ അനാലിസിസ് പറയുന്നു. സയൻസ് ഡയറക്ട് എന്ന ജേണലിലാണ് ഈ പഠനം പ്രസിദ്ധീകരിച്ചിരിക്കുന്നത്
ഹൃദയാരോഗ്യം മെച്ചപ്പെടുത്തും
നെല്ലിക്കയിൽ എംബ്ലിക്കനിൻ എ, ബി, പെഡുങ്കുലാജിൻ തുടങ്ങിയ ആന്റിഓക്സിഡന്റ് ഗുണങ്ങളുള്ള പോളിഫിനോളുകൾ ധാരാളമായുണ്ട്. ഈ സംയുക്തങ്ങൾ എൽഡിഎൽ കൊളസ്ട്രോളിന്റെ ഓക്സീകരണം തടയുന്നു. അതിറോസ്ക്ലീറോട്ടിക് പ്ലേക്കുകളുടെ രൂപീകരണത്തിലെ പ്രധാനപടിയാണിത്. എൽഡിഎൽ കൊളസ്ട്രോളിന്റെ ഓക്സീകരണം തടയുകവഴി ധമനികളിൽ പ്ലേക്ക് രൂപപ്പെടാനുള്ള സാധ്യത കുറയ്ക്കാൻ നെല്ലിക്ക സഹായിക്കും. ഇത് ഹൃദയാരോഗ്യം നിലനിർത്താൻ സഹായിക്കും.
ഇന്‍ഫ്ലമേഷൻ കുറയ്ക്കുന്നു
ഹൃദയസംബന്ധമായ രോഗങ്ങൾക്കുള്ള സാധ്യത കൂട്ടുന്ന ഒന്നാണ് വിട്ടുമാറാത്ത ഇൻഫ്ലമേഷൻ. സി റിയാക്ടീവ് പ്രോട്ടീനിന്റെ (CRP) അളവ് കുറയ്ക്കാൻ ആന്റി ഇൻഫ്ലമേറ്ററി ഗുണങ്ങളുള്ള നെല്ലിക്ക സഹായിക്കുന്നു. ഇൻഫ്ലമേഷൻ കുറയുകവഴി ഹൃദയത്തിന്റെ പ്രവർത്തനങ്ങൾ മെച്ചപ്പെടുകയും ഹൃദ്രോഗം തടയുകയും ചെയ്യും
എൻഡോത്തീലിയൽ പ്രവർത്തനം മെച്ചപ്പെടുത്തുന്നു
എൻഡോത്തീലിയൽ പ്രവർത്തനം മെച്ചപ്പെടുത്താൻ നെല്ലിക്ക സഹായിക്കും. രക്തക്കുഴലുകളുടെ പ്രവർത്തനം നിലനിർത്താൻ ഇത് ആവശ്യമാണ്. എൻഡോത്തീലിയൽ പ്രവർത്തനം മെച്ചപ്പെടുത്തുക വഴി രക്തപ്രവാഹം മെച്ചപ്പെടുത്താനും ഹൃദയസംബന്ധമായ രോഗങ്ങൾക്കുള്ള സാധ്യത കുറയ്ക്കാനും നെല്ലിക്ക സഹായിക്കുന്നു.
∙ നെല്ലിക്ക ശരിയായ രീതിയില്‍ കഴിക്കാം
നെല്ലിക്ക പലതരത്തിൽ ഭക്ഷണത്തിൽ ഉൾപ്പെടുത്തണം. ഹൃദയാരോഗ്യം മെച്ചപ്പെടുത്താനും കൊളസ്ട്രോൾ കുറയ്ക്കാനും നെല്ലിക്ക പോഷകഗുണങ്ങൾ ഒട്ടും നഷ്ടപ്പെടുത്താത്ത രീതിയിലും പഞ്ചസാരയും മറ്റ് അഡിറ്റീവുകളും ഒന്നും ചേര്‍ക്കാതെയും ഉപയോഗിക്കുക. ഫ്രഷ് ആയ നെല്ലിക്ക കഴിക്കാൻ ശ്രദ്ധിക്കാം. ഇത് വൈറ്റമിൻ സി യും പൊളിഫിനോളുകളും ധാരാളമായി ലഭിക്കാൻ സഹായിക്കും. ഇതിലൂടെ ആന്റിഓക്സിഡന്റ് ഗുണങ്ങൾ ലഭിക്കുകയും കൊളസ്ട്രോൾ കുറയ്ക്കാൻ സഹായിക്കുകയും ചെയ്യും
നെല്ലിക്ക ജ്യൂസ്
പരമാവധി ആന്റി ഓക്സിഡന്റുകളും പോളിഫിനോളുകളും ലഭിക്കാൻ നെല്ലിക്ക ജ്യൂസ് സഹായിക്കും. മധുരം ചേർക്കാത്ത നെല്ലിക്ക ജ്യൂസ് ദിവസവും രാവിലെ വെറുംവയറ്റിൽ കുടിക്കുന്നത് നല്ലതാണ്.
∙ ഇങ്ങനെ കഴിക്കുന്നത് ഒഴിവാക്കാം
നെല്ലിക്ക അങ്ങേയറ്റം ഗുണകരമാണെങ്കിലും ചില രീതിയില്‍ കഴിച്ചാൽ ആരോഗ്യഗുണങ്ങൾ കുറയുകയും അനാവശ്യ കാലറി ശരീരത്തിലെത്തുകയും ചെയ്യും. നെല്ലിക്ക ഷുഗർ സിറപ്പിലിട്ട് തയാറാക്കുന്നവ ഇത്തരത്തിൽ കലോറിയും പഞ്ചസാരയുടെ അളവും വർധിപ്പിക്കുന്നതാണ്. മധുരം കൂടുന്നത് നെല്ലിക്കയുടെ, കൊളസ്ട്രോൾ കുറയ്ക്കാനും ഹൃദയാരോഗ്യം മെച്ചപ്പെടുത്താനുമുള്ള ഗുണങ്ങളെ ഇല്ലാതാക്കും
നെല്ലിക്ക സപ്ലിമെന്റുകൾ
ക്യാപ്സൂൾ, ഗുളികകൾ, പൊടി തുടങ്ങിയ രൂപങ്ങളിൽ നെല്ലിക്ക സപ്ലിമെന്റുകൾ ലഭ്യമാണ്. എന്നാൽ ശരിയായി ഉപയോഗിച്ചാൽ മാത്രമേ ഇവയുടെ ഗുണങ്ങൾ ലഭിക്കൂ. എല്ലാവർക്കും ഇത് യോജിക്കില്ല എന്നതുകൊണ്ട് ഒരു ആരോഗ്യവിദഗ്ധന്റെ നിർദേശപ്രകാരം മാത്രമേ സപ്ലിമെന്റുകൾ കഴിക്കാൻ പാടുള്ളൂ.
∙ ആരൊക്കെ നെല്ലിക്ക ഒഴിവാക്കണം?
രക്തസമ്മർദം കുറവുള്ളവർ, രക്തത്തിലെ പഞ്ചസാരയുടെ അളവ് കുറവുള്ളവർ, ബ്ലഡ്തിന്നിങ് മരുന്നുകൾ കഴിക്കുന്നവർ, ഗർഭിണികളും മുലയൂട്ടുന്ന അമ്മമാരും, വൃക്കരോഗങ്ങൾ ഉള്ളവർ ഇവർ നെല്ലിക്ക കഴിക്കുന്നത് ഒഴിവാക്കണം. ആരോഗ്യമുള്ള വ്യക്തികൾ ആണെങ്കിലും അമിതമായ അളവിൽ നെല്ലിക്ക കഴിക്കുന്നത് അസിഡിറ്റി, നിർജലീകരണം, ദഹനപ്രശ്നങ്ങൾ തുടങ്ങിയ പാർശ്വഫലങ്ങളുണ്ടാക്കും. നെല്ലിക്ക പതിവായി കഴിക്കും മുൻപ് വൈദ്യനിർദേശം തേടുന്നത് നല്ലതായിരിക്കും
