ഉപഭോക്താക്കൾ പണം മുടക്കേണ്ട ഇന്ധന തകരാർ സൗജന്യമായി പരിഹരിച്ചു നൽകുമെന്ന് മാരുതി സുസുക്കി

 

ഇന്ധന മീറ്ററിലെ തകരാർ സൗജന്യമായി പരിഹരിച്ചു നൽകുമെന്ന് അറിയിച്ച് മാരുതി സുസുക്കി. ഗ്രാൻഡ് വിറ്റാര എസ്‌യുവിയുടെ 39,506 യൂണിറ്റുകളുടെ തകരാറാണ് പരിഹരിച്ചു നൽകുക. സ്പീഡോമീറ്റർ അസംബ്ലിയിലെ ഫ്യുവൽ ലെവൽ ഇൻഡിക്കേറ്ററിലും ലോ ഫ്യുവൽ വാണിങ് ലൈറ്റിലുമാണ് നേരിയ തകരാർ സംഭവിച്ചത്.  2024 ഡിസംബർ 9-നും 2025 ഏപ്രിൽ 29-നും ഇടയിൽ നിർമ്മിച്ച വാഹനങ്ങളിലാണ് ഈ പ്രശ്നം കണ്ടെത്തിയത്. ഇവയിൽ തെറ്റായ ഇന്ധന നിലയാണ് കാണിക്കാൻ സാധ്യതയുള്ളത്. അതിനാൽ തന്നെ എസ്‌യുവി അപ്രതീക്ഷിതമായി ഇന്ധനം തീർന്ന് നിലച്ചുപോകാനുള്ള സാധ്യതയും തള്ളിക്കളയാനാവില്ല. 

ഇന്ധന ഗേജ് പ്രദർശിപ്പിക്കുകയും ലോ ഫ്യുവൽ വാണിങ് ലൈറ്റ് നിയന്ത്രിക്കുകയും ചെയ്യുന്ന സ്പീഡോമീറ്റർ അസംബ്ലിയിലാണ് പ്രശ്നം. തകരാറുള്ള ബാച്ചിലെ വാഹനങ്ങളിൽ, ഇവ ടാങ്കിലെ യഥാർത്ഥ ഇന്ധനത്തെ ശരിയായി കാണിച്ചേക്കില്ല. ഇത്, ഇന്ധനത്തിന്റെ കാര്യത്തിൽ ഡ്രൈവർമാർക്ക് തെറ്റിദ്ധാരണയുണ്ടാകാൻ കാരണമാകും. തെറ്റായ റീഡിംഗുകൾ കാരണം ഡ്രൈവർമാർ വഴിയിൽ കുടുങ്ങിപ്പോകാൻ സാധ്യതയുള്ളതിനാലാണ് മാരുതി സുസുക്കി പരിഹാരവുമായി എത്തിയത്. ഇന്ധനം ഒരു നിശ്ചിത നിലയിലേക്ക് താഴുമ്പോൾ ഡ്രൈവർക്ക് മുന്നറിയിപ്പ് നൽകാനാണ് ലോ ഫ്യുവൽ വാണിങ് ലൈറ്റ് കൊണ്ട് ഉദ്ദേശിക്കുന്നത്. ആ മുന്നറിയിപ്പ് ശരിയായി പ്രവർത്തിക്കേണ്ടതാണ്. 

2024 ഡിസംബർ 9-നും 2025 ഏപ്രിൽ 29-നും ഇടയിൽ നിർമ്മിച്ച 39,506 ഗ്രാൻഡ് വിറ്റാര യൂണിറ്റുകളാണ് ഈ പരിധിയിൽ വരുന്നത്. 2025 സെപ്റ്റംബറോടെ ഗ്രാൻഡ് വിറ്റാരയുടെ മൊത്തം വിൽപ്പന 3,25,000 കടന്നിരുന്നു.  2025 ഒക്ടോബറിൽ മാത്രം മോഡൽ 10,409 യൂണിറ്റുകൾ വിറ്റഴിച്ചു, 

പ്രശ്നമുള്ള വാഹനങ്ങളുടെ ഉടമകളെ അംഗീകൃത ഡീലർ വർക്ക്‌ഷോപ്പുകൾ വഴി ബന്ധപ്പെടുകയാണ് ചെയ്യുക. കമ്പനി സ്പീഡോമീറ്റർ അസംബ്ലി പരിശോധിക്കുകയും തകരാറുള്ള യൂണിറ്റ് സൗജന്യമായി മാറ്റി സ്ഥാപിക്കുകയും ചെയ്യും. ഉപഭോക്താക്കൾക്ക് തങ്ങളുടെ എസ്‌യുവി ഇതിൽ ഉൾപ്പെട്ടിട്ടുണ്ടോയെന്നറിയാൻ മാരുതി സുസുക്കിയുടെ ഔദ്യോഗിക വെബ്‌സൈറ്റിൽ വെഹിക്കിൾ ഐഡന്റിഫിക്കേഷൻ നമ്പർ (VIN) അല്ലെങ്കിൽ ഷാസി നമ്പർ നൽകി പരിശോധിക്കാവുന്നതാണ്, അല്ലെങ്കിൽ അടുത്തുള്ള അംഗീകൃത മാരുതി സുസുക്കി / നെക്‌സ ഡീലറെ ബന്ധപ്പെടാവുന്നതാണ്.

പ്രശ്നമുള്ള വാഹനം വർക്ക്‌ഷോപ്പിൽ എത്തിച്ചാൽ, തകരാറുള്ള ബാച്ചിൽ നിന്നുള്ളതാണോ എന്ന് സ്ഥിരീകരിക്കുന്നതിനായി ടെക്‌നീഷ്യൻമാർ സ്പീഡോമീറ്റർ അസംബ്ലി പരിശോധിക്കും. തകരാറുണ്ടെങ്കിൽ, അസംബ്ലി തിരുത്തിയ യൂണിറ്റ് ഉപയോഗിച്ച് മാറ്റിസ്ഥാപിക്കും. പരിശോധനയും മാറ്റിസ്ഥാപിക്കലും ഉൾപ്പെടെയുള്ള ഈ പ്രക്രിയ ഉപഭോക്താവിന് യാതൊരു ചിലവുമില്ലാതെ പൂർത്തിയാക്കും. മാരുതി സുസുക്കിയുടെ ഗുജറാത്തിലെ പ്ലാന്റിലാണ് ഗ്രാൻഡ് വിറ്റാര നിർമ്മിക്കുന്നത്, ഇവിടെ നിന്ന് കയറ്റുമതിയും ചെയ്യുന്നുണ്ട്